الخطبة الحمصية

من طرف **Hamadah** 11/08/10, 09:31 pm

الزواج هوي سنة الكون وكل واحد فينا بيسعى الو وبيكافح مشان يكفي نص دينو
ويرتاح و ويلاقي السعادة والحب الي كان عم يتمناه ويدور عليه مع شريك العمر
الزواج سعادة
الزواج مسؤولية
الزواج تعاون
الزواج محبة
الزواج اتحاد
الزواج راحة ( وعند البعض هم كبير )
والزواج والزواج....................ولو ضلينا عم نحكي عن الزواج لبكرا ما منخلّص

والاهل مناهن انن يزوجوا اولادن ويفرحو فيهون ويشوفو ولاد ولادن

يعني ما بتصدق الام تسمع من ابنها كلمة ( ماما اخطبيلي )او ( بدي اخطب ) لحتى تفقعلك هديك الزلغوطة
وتقول ( تقبر قلبي من بكرا بروح دورلك على بنت الحلال)
وبتبلّش الام تسأل ابنها على المواصفات اللي بدو ياها ابنها بالعروس مشان تعرف شو تشفلوا
هادا اذا ماكان الشب حاطط عينو على بنت معينة وبدو امو تروح وتخطبلوا ياها مباشرة بدون ما تدور وتعذب حالا
وبالحالة الاولى بتبلش الام تسأل وتبحث وتدقق وتستفسر من هالنسوان عن
البنات ( جمالهن – اعمارهون- شو دارسين – من بيت مين؟؟...........الخ)
والكل بدو الافضل وبدو يصاهر احسن العالم وهادا الشي مو غلط
بس بالاخر ماحدا بياخد غير نصيبو
وكمان ماحدا بيعرف وين نصيبو وشو مخبيلو المستقبل وعلم الغيب عند الله فقط والله يجعل نصيبنا متل ما منحب

من زمان كان في وحدة بيقولولها الخطّابة وشغلة الخطابة انها تدور وتشوف
هالبنات وتسأل عنهن وتنقل اخبار هالبنات للاهل اللي بدون يخطبوا لأولادهن

ومتل ما بيقولوا بالمتل المصري ( يا بخت مين وفّق راسين بالحلال ) وبيقولوا
عنا احيانا ( نيالوا اللي بيجمع راسين بالحلال على مخدة وحدة )
وفي البعض بيقولوا عنا ( مشي بجنازة ولا تمشي بجوازة ) يا ترى صحيح هالشي؟؟؟؟؟
عنا في مجتمعنا الحمصي الخطبة الها نكهة معينة وعادات وتقاليد بعض الناس لهلأ بتمشي عليها
ولا تخلو هالعادات من الطرافة والظرافة
وهاي قصة من القصص اللي بتحكي طريقة الخطبة الشعبية عنا بحمص
تابعوا واستمعوا

-----------------------------------------------------------------------------------

أبطال القصة شخصيات منتقاة من الواقع

الوقت الساعة 12 ظهرا

المكان مدينة حمص في أحد الأحياء الشعبية

الحوار:

الخطابة: تطلب الرقم.....عم يرن التلفون.....قريضة انشالله ليش ما حدي عم يرد؟شو نايمين لهلأ؟
ارتفعت السماعة ......ألو
الخطابة : مرحبا خالي
البنت : أهلين
الخطابة : شلونك
البنت : الحمد لله ماشي الحال
الخطابة : الماما هون خالي؟
البنت : أي هون مين بدو ياها؟
الخطابة : قوليلا وحدة
البنت : دقيقة شوي
البنت تنادي أمها: مامااااااااااا يا ماماااااااااااااااا
الام : شبيك
البنت : تعي احكي عالتلفون
الام : مين؟
البنت : وحدة ما بعرف مين
الام : هاتي لشوف هالسماعة ......ألو
الخطابة : مرحبا يا خيتو
الام : اهلين وسهلين
الخطابة : شلونك
الام : الحمد لله
الخطابة : ما أم عبدو؟
الام : أي نعم......مين حضرتك؟؟
الخطابة : يه ما عرفتيني؟
الام: لا والله
الخطابة : يه انا أم فاروق اللي كانت بصمدت بنتا لأم فيصل وكنتي انتي حاضرة كمان
الام : والله يا خيتو ما تذكرتك
الخطابة : وقتا قلتلك هاي بنتك اللي عم ترقص ؟؟قلتيلي أي ....شو ما تذكرتي؟
الام : أي أي ييي صحي...........اهلين وسهلين يا أم عبدو
الخطابة: بالمأهل ..........وقتا سألتك اذا بتخطبي بنتك قلتيلي أي اذا بيجي نصيبا
الام : أي والله
الخطابة : خلص خيتو......اليوم شو عندك بعد العصر
الام: ييي والله اليوم عندي دوارة انا وسلفتي بعد العصر
الخطابة : طيب منجي هلأ
الام :والله يا خيتو عم سقّط الرزات هلأ بيجي أبو عبدو جوعان خطي بدو يتغدى
الخطابة : بكرا لكان بعد العصر
الام : أي اهلا وسهلا بتشرفوا
الخطابة : يزيدك شرف يا أم عبدو.......والله قلبي انفتحلك وحبيتك كتير
الام : الله يسلمك ويحفظك
الخطابة : خاطرك خيتو ......
الام : الله معك مع السلامة

تاني يوم الساعة 5 بعد العصربتجي الخطابة على بيت الجماعة هيي وأختا أم
أحمد وكل وحدة جايبي معها كيس نايلون وحاطا فيه الكندرة الجديدة

شلحو كنادرون عالدرج ولبسوا الكنادر الجديدة اللي بالكيس ( أهيب قدام الجماعة )
رنو الجرص وفتحت الام الباب: وبعد السلام و الاهلا والسهلا وطق البوسات الحميمية
فاتو هالجماعة وقعدوا بالصالون
الام : انتو من بيت مين ؟
الخطابة : والله يا خيتو نحنا من بيت (...........)
الام : والله والنعم والسبع تنعام منكون...............عن اذنكون شوي
وبتقوم الام وبتروح بتقول لبنتا : يالله قومي لبسي وفوتي ضيفي القهوة وعديلك دقيقتين مشان يشوفوكي ووقت بغمزك بتقومي بتمشي
البنت : طيب ماما
في هذه الاثناء في الصالون
الخطابة لاختها ام احمد : شفتي ولك اختي؟ بيتون مرتب وأكابري.......ليكي على هالصالون ما احلا
ام احمد :أي والله يا اختي.....والام مبين عليها اكابرية كمان .....شفتي على هالكتف الراكز اللي الها ؟
الخطابة : أي والله............بركي ولك اختي بيكون نصيبنا عند
هالجاعة..........اي والله مليت من التكحيف من هون لهون وانا عم دق بواب
ام احمد : انشالله
بترجع الام : اهلا وسهلا
بعد 5 دقائق بتجي البنت لابسة ومتهندسي وشايلة صينية القهوة وعم تمشي شوي شوي
البنت : مرحبا خالي
الخطابة : اهلين وسهلين بنور العين اسامي الله حولك وحواليكي
البنت عم تقدم القهوة: تفضلي خالي
الخطابة : يسلمو هالديات يا أميرة
ضيفت البنت القهوة وراحت قعدت مقابيل أمها
الخطابة لاختها ام احمد همسا: حلوة ولك يا اختي
ام احمد همسا : ما كل هالاد ولك اختي.....مانك شايفي شلون الها شترة وتمها كبير هاي شلون اذا ضحكت؟
الخطابة : لك اختي منيحة ...هاي احلا وحدة منشوفا لهلأ
ام احمد : شو اسمك خالي؟
البنت وهيي خجلانة : اسمي سوزان
ام احمد: عاشت الاسامي يا خالي
الخطابة : شو عم تدرسي خالي؟ بكاروليا؟؟
البنت : لا خالي لساتني حادي عشر
الخطابة : ايه الله يوفقك يا خالي
البنت : شكرا خالي
الام غمزت بنتا مشان تقوم فبتقوم البنت وبتطلع لبرا
الخطابة عم تهمس بأذن اختا ام احمد : رح اطلبا لك اختي هلأ
ام احمد : بكير لك اختي لسا ما سألنا عالجماعة منيح
الخطابة : لا يا اختي المكتوب مبين من عنوانو
الخطابة :أي اختي ام عبدو.....نحنا طالبين القرب منكن وانتو والهي دخلتو قلبنا بسرعة وحبيناكون كتير
الام : أديش عمرو ابنكون؟
الخطابة : ياستي ابني عمرو 27 سنة شب طول بعرض يخزي العين
الام :وشو بيشتغل ابنك؟
الخطابة : ييييه مشارك ابن عمو على سرفيس مشغلينو على طريق الشام وابوه عندو محل خضرة بسوق الحشيش
وابني خادم جيش ومخلص وصرلو سنة عم ينئ عليي بدو يتجوز...يقبر قلبي
الام : عندو بيت لحالو؟؟
الخطابة : لا والله يا خيتو عندو بيت آجاربجورة الشياح 3 أوض ومنافعون
الام :وين ساكنين يا خيتو؟
الخطابة : يييي بيتنا بباب هود
الام :والله ياخيتو لازم شوف ابو عبدو وآخد شورو .......ولازم نسأل عن ابنكون كمان والله يقدم اللي فيه الخير
الخطابة : ايه متل ما بدك اختي ام عبدو......وبهاليومين بحكي معك تلفون
الام :بيصير خير انشالله
الخطابة: خاطرك
الام : الله معكون مع السلامة

--------------------------------------------------------------------

وللقصة تتمة....

من طرف **المــ♥ــلك** 11/08/10, 09:38 pm

الخطابة : ييييه مشارك ابن عمو على سرفيس مشغلينو على طريق الشام وابوه عندو محل خضرة بسوق الحشيش
وابني خادم جيش ومخلص وصرلو سنة عم ينئ عليي بدو يتجوز...يقبر قلبي

الشغل مو عيب .. شايفلكن نحنا ع هالحالة هيك رح نخطب .. مشكور حماده عـ القصة حلوة
وفيها تعريف بعادات الغير ..

الخطبة الحمصية F40aafbc7f

..

من طرف **Hamadah** 11/08/10, 09:39 pm

هلا بالملك ونطور التتمة

من طرف **M A N A R** 11/08/10, 10:49 pm

مشكور ياغالي بس ماتكون التتمة طويلة

ههههههههههههههههههههههههههههههههههههههههههههههههههههههههههههههههههههههههههههههههههه

من طرف **Hamadah** 11/08/10, 10:56 pm

لا
لا
انشا الله مو طويلة

من طرف **سوريه** 12/08/10, 12:13 am

شو حضران الخطبه بالتفصيل
مشكور

من طرف **Hamadah** 12/08/10, 12:18 am

هههههههههه تقريبا لسا الخير لقدام ترقبو

لسا في جزءء تاني وتالت ورابع وبيجوز يقلب باب الحارة

الخطبة الحمصية Lol

نورتي

من طرف **سوريه** 12/08/10, 12:45 am

لكن الله يتمم الخير

من طرف **Hamadah** 12/08/10, 01:10 am

امييييييييييييييين

من طرف **water lily** 12/08/10, 02:06 am

ههههههههههه الخطبة الحمصية Lol

والله ياحمادة احلى مسلسل خطبة حضرتو بحياتي

جد مشكور لأن الي زمان ما ضحكت وضحكتني

من طرف **Hamadah** 12/08/10, 02:08 am

هههههههههه انتظري العدد القادم

من طرف **NAPOLION MARMARITA** 12/08/10, 02:11 am

يستر عليك بلا التتمة لعولي قلبي عحكي
مششكور

من طرف **Hamadah** 12/08/10, 02:19 am

بشرفك يعني الكل عم يطالب بالتتمة وحضرتك بدك وقف؟؟

عكلن مشكور ورح كمل

من طرف **Salam** 12/08/10, 02:51 am

ههههههههههههه متابعة متابعة

من طرف **Hamadah** 12/08/10, 07:26 pm

يلا هه اجاكي الجزء التاني

من طرف **Hamadah** 12/08/10, 07:29 pm

لجزء الثاني:

اخواني واخواتي الاحبة:

عادات الزواج والخطبة عنا بحمص كتير خاصة ومميزة
وشفنا كيف بالجزء الاول من القصة كيف راحت الخطابة أم فاروق هيي واختا أم أحمد لتخطب لابنها وشافت البنت وعجبتا وطلبتها من أمها فورا ( وها الشي يا ما صاير بمجتمعنا ) ووعدت أم البنت أنو تشاور جوزا ويسألوا عن الجماعة ويردولن خبر ( طبعا هيك الاصول )
رح نكملكن شو صار بقصة هدول الجماعة الحماصنة و آلية الخطبة اللي رح تتم حسب التراث والعادات والتقاليد

تابعوا معنا

هادا يا جماعة الخير بلشوا أهل هالبنت يسألوا عن العريس الجديد ويعرفو أصلوا وفصلوا وممشاه ووين بروح ووين بيجي
وضل أبو هالبنت يلف ويدور ويسأل عن هالشب , ووصل لجنب بيت الجماعة وراح يسأل السمان اللي عالسوكي وصار بيناتن الحوار التالي:

الاب : السلام عليكم
السمان : وعليكم السلام
الاب : خيو بدنا نسألك سؤال بلا صغرة
السمان : أي تفضل سئال
الاب : في جيرانكون هون من بيت (................) بتعرفون شي؟
السمان : أي لكن أخي لكن هدول جيراني وزبايني من زمان وبعرفون كلياتن
الاب: بتعرف ابنن فاروق؟
السمان :أي لكن انا اللي بعرفوا صاحب ابني سليمان الروح بالروح, شو القصة لك أخي كأنو الشغلة فيها خطبي وجازي
الاب : أي والله يا أخي
السمان :شوف لقلك لك أخي ,الجماعة ما فيون شي والسبع تنعام منون واببن أخلاقوا منيحة ولالو لا طلعات ولا فوتات
الاب :شو هالحكي؟
السمان : متل ما عم قلك والله , ولو عندي بنت وطلبا مني كنت عطيتون عالسريع
الاب :كتر خيرك يا سيدي والله يعطيك العافي
السمان :ولو يا أخي اهلا وسهلا حلّت البركي
الاب : خاطرك السلام عليكم
السمان : لك وييين عود لنفتحلك كازوزة
الاب : غير مرة انشالله, ............السلام عليكم
السمان : وعليكم السلام ورحمة الله وبركاتو

المهم الاب خرط مشطو هالشب وعجبوا اللي سمعوا من هالعالم عن هالجماعة وقرر أنو يعطيهون بنتو ( مع انو الشب عندو بيت بالآجار)

(ابو البنت وام البنت مساء في السهرة)

المشهد :
ام عبدو عم تحفر البيتنجان مشان تعمل محشي بكرا وابو عبدو عم يتفرج عالتلفزيون والبنت بأوضتا عم تدرس:

ابو عبدو : والله اليوم رحنا سألنا عالولد
ام عبدو : أي وشو قالولك؟
ابو عبدو : والله مدحولي منون كتير والجماعة وضعون على قدو ها يعني مانن كتير مريشين
ام عبدو : ييييي ( وهيي عم تنشتر ,أنو ما عجبا الوضع )
ابو عبدو :شبيك؟ الناس مدحولي كتير من اخلاقون ونحنا شو بدنا غير السترة لبنتنا
ام عبدو : وقال شو يا بعدي بدو يسكنا ببيت الاجرة , بكرا سنة زمان بيطلع من البيت وبروح بيسكنها عند أمو
وخود عاد كل يوم نقار وبكرا ما بتشوفا غير حردت وأجت قعدت بخلقتك ,( وقريضة انشالله هاي بعجنا البيتنجاناي )
تصطفل بنتك وانتي حر فيها
ابو عبدو : كبري عقلك يا مرا هلأ دغري حردتيها للبنت ,لك لسا ما لحتى يصير نصيب بالاول؟
خلص بكرا اتصلي بالجماعة وقوليلون يتفضلوا مشان يشوفوا البنت
ام عبدو :اييييه متل ما بدك

تاني يوم بعد ما هدّت ام عبدو على طنجرة المحشي رفعت هالسماعة واتصلت بالجماعة وصار هالحوار:

ام عبدو : ألو مرحبا
الخطابة : أهلين ....منك انتي؟
ام عبدو : أنا ام عبدو
الخطابة ( طبعا ام فاروق اسمها) : ييي ميت اهلين وميت سهلين اهلين بأم عبدو
أم عبدو : شلونك خيتو
ام فاروق : والله الحمد الله ماشي الحال, شلونك انتي وشلون اللي عندك وشلونا عروستنا؟
ام عبدو : بيدعوا بسلامتك
خيتو تفضلوا بكرا المسا بعد العشي شمان تشوفو البنت
ام فاروق : ايه يزيد فضلك يا خيتو , بكرا بعد العشي انشالله منكون عندكون
ام عبدو : خير انشالله ونحنا بانتظاركون
ام فاروق: على خير انشالله
ام عبدو : خاطرك
ام فاروق: الله معك مع السلامة

وتاني يوم الساعة 8 ونص بعد صلاة العشاء راحت أم فاروق هيي وابنها ( العريس ) وأبو فاروق لعند الجماعة

ودخلوا الجماعة لعند بيت العروس وفات أبو فاروق وابنو عالصالون وفاتت أم فاروق عؤضة القعدي
( طبعا كان حاضر من قبل العروس ابوها وعمها وأخوها الكبير)

المهم أجت البنت لتفوت تضيف القهوة للعريس الجديد
لبست تياب محتشمة شوي وحطت حجابها وحملت صينية هالقهوة ودخلت عالصالون وصار الحوار التالي:

البنت : السلام عليكم
الجماعة الجالسين : وعليكم السلام
البنت عم تضيف أبو العريس: تفضل عمو
ابو فاروق : الله يسلم هالديّات يا عمو
البنت عم تضيف العريس وهيي خجلانة وحاطة عينا بالأرض: تفضل
العريس وهوي خجلان ووجهو متل الشوندرة وعم يتطلع من تحت لتحت بالبنت : يسلمو...
ووقت شال العريس فنجان القهوة اطلعت فيه البنت مشان تشوفو مزبوط وتأكد فيه منيح

المهم كملت البنت ضيافة القهوة لأبوها وعما وأخوها وطلعت لبرات الصالون بسرعة

وبعد شي نص ساعة من تجاذب اطراف الحديث والتعرف مزبوط على الجماعةوالاستفسار عن العريس من قبل ابو البنت وعمها وأخوها متل ( شو بتشتغل وكيفو شغلك ومن هالحكي اللي بلا طعمي اللي بيسألوه للعريس أول ما بيتقدم للعروس
المهم وفي أثناء جلسة النسوان مع بعضون قالت أم فاروق لأم عبدو: ابعتولنا ورا العريس مشان يقعدلو هون شوي
وفهمت الام انو الشب بدو يقعد مع البنت هوي وأمو لحالون مشان يتقرر نصيب هالخطبة

المهم وبلا طول سيرة قام العريس من بين الرجال وأجا وقعد مع أمو بؤضة القعدة وطلعت الام برات الأوضة
وصار هالحوار
أم فاروق : شو لك أمي عجبتك البنت؟؟
فاروق : أي والله يا أمي كتير عجبتني
أم فاروق : لكن هلأ بتجي بتفوت هالبنت وقعود جمبا وسايرا شوي وبس قلك لبّس بتقوم بتلبسها الخاتم
فاروق : ماشي أمي

وبع شوي فاتت هالبنت مشا تضيف كاسة البوظا وقطعة الكاتو
ضيفت الجماعة وقعدت عجنب
وبلش هيك حوار خفيف بينها وبين الشب ( وبهيك حالات بكون الحوار مختصر وبسيط لأنو التنين بكونوا خجلانين من بعض لسا
وبع شوية هالحكي غمزت الام ابها وقالتلوا : قوم أمي لبسها
قام هالعريس وراح قعد جمب البنت وطالع من جيبتو هالخاتم ومدت هالعروس ايدها ولبسا الشب الخاتم

وهون نطت أم فاروق وطرقت هديك الزلغوطة

وبعد المبروك والله يتمم على خير وقبل ما يمشو الجماعة طلب الابن من أمو انو تقول لأم البنت أنو الشب بدو يحكي مع البنت عالتليفون ( مشان تكمل المودة ومشان ينكسر حاجز الخجل قبل ما تصير الخطبة الرسمية )

ووافقوا والله الجماعة وما قالوا شي

وطلعوا بيت العريس من عند الجماعة والعريس ضحكتوا لورا أدنيه
وفاتت العروس على أوضتا وسكرت الباب وهيي فرحانة بعريسها وعم تلعب بالخاتم اللي بأيدها

وللقصة تتمة...................فترقبوها

من طرف **الـمعـتز باللــــ?** 12/08/10, 07:39 pm

خخخخخخخخخخخ
في انتظار التتمة

من طرف **الـمعـتز باللــــ?** 12/08/10, 07:40 pm

حظي حلو هلأ نزل الجء التاني رح اقراه

من طرف **المــ♥ــلك** 12/08/10, 07:41 pm

وهون نطت أم فاروق وطرقت هديك الزلغوطة

:lol!: :lol!: .. عجبتني أكتر شي .. يسلمو حمادة وناطرينك لأجزاء قادمة

من طرف **Hamadah** 12/08/10, 07:44 pm

ههههههههههه نورت معتزز

وانت ياكنغ ع قبال مانزلغط بعرسك

من طرف **الـمعـتز باللــــ?** 12/08/10, 07:46 pm

لك يازلمي بس فهمني هاللهجة القاتولية هي من وين الجماعة بلا صغرة كتير متقلها
بس حلووووووووووة كتير
وفي الانتظار

من طرف **Hamadah** 12/08/10, 07:51 pm

ههههههههه هدول من جورة الشياح مع احترامي لاهل المنطقة هنيك

نورت معتز

من طرف **Altyb RaWad** 12/08/10, 08:21 pm

ههههه ياسيدي حاسس حالي عايش بالجوووو..... اي عقبال العزابية ياشباب

من طرف **Hamadah** 12/08/10, 08:31 pm

هلا هلا نورت

من طرف **Salam** 13/08/10, 12:25 am

في كلمة حمصية بحبها كتير

خود عاد

ههههههههههههه متابعة

الخطبة الحمصية

الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية

رد: الخطبة الحمصية