بتتذكر فوتوا لنشوف اذا بتتذكروا

من طرف **M A N A R** 22/08/10, 04:03 pm

بتتذكروا... يوم يجي أخوك الأكبر منك ويقول لك: بدك أرسم لك ساعة وانته تمد
إيدك ويعضّك هديك العضة اللي تضل مرسومة أسبوع

بتتذكروا.. يوم كنا نتصوّر عند مصوّر العيلة وطبعاً غصب عنك الخلفية زرقاء مو بكيفك ولازم تمشط شعرك بالمشط اللي عنده.. كله شعر...

‏ بتتذكروا... المصيص الأحمر اللي بيعلق بالسنان ومعو عود لونه احمر مخطط بالأبيض وكنا نقلبو بالمقلوب ونحطو ع الشمعة أو الغاز وننفخ مشان نساوي فقاقيع وطبعا ما تطلع النفيخة لحتى تطلع زلاعيمك معها وتنحرق كل أصابيعك.

بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله
.

بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل.

‏ بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك.

‏ بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة وكل ما بدك تجي تاخدها تلاقي الوالدة حاططته تحت ومانو متلّج.. يا حسرة.

بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طوال النهار وآخر الشي تنفكش رجل شي واحد وما ينام الليل لأنو رجلو ورمانة..

بتتذكروا... عزايم قبل والسفرة ومفرش الطاولة اللي عليه صورة (‏فواكه) ‏وريحتو لازم مثل ريحة المطبخ وقاعد على كراسي القش اللي لما تقوم تلاقي سيقانك عليها شخوط ومربعات.

بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو برتقالي مشان نظلل على الشي المهم وآخر شي نظلل على كل الكتاب.. وين الشي المهم؟؟ ما بعرف!!!!

بتتذكروا.. أول ما يسرق الأولاد سيارة أبوهم كانت الرجل اليمين على البنزين والرجل اليسار على الفرام من شدة الفرحة .... ‏ولازم طبعاً يمر على أولاد الحارة ويطلعوا معو شي خمسين واحد

‏ بتتذكروا.. لما تتقاتل مع ولد الجيران وتقول له: انقلع عن بيتنا وعن رصيفنا...

يقول لك: مو رصيفكن هادا رصيف الحكومة
كلام منطقي, ‏ويتم يمرق قدام البيت ويقول لك مادخلك.

بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله.

بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت.

واللي ما عمل شي من المذكور فوق بيكون من جيل الهمبرغر وسبيس توون وأبطال الديجتال..راحت عليكم هديك الأيام

أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير..

أول ما يفتح التلفزيون بتلاقيه يتفرج ع هيفا ونانسي وروبي

وعلى أيامنا قصص عالمية وسهرة صباحية ع الشدة كل ليلة خميس

وأم عمار ببرنامج ما يطلبه الجمهور

وعصمت رشيد يغني بين الشوطين

ويوم الجمعة سيران والله أيام

للأسف صار الجيل الجديد بلا هوية

تذكروني ان نفعت الذكرى

من طرف **تقوى** 22/08/10, 07:53 pm

كلامك صحيح والله مشكور انا كمان عملت شوي من يلي قلتن فعلا ايم والله

من طرف **M A N A R** 22/08/10, 08:24 pm

هلا تقوى نورت الموضوع

مشكورة على مرورك

من طرف **b a s e m** 22/08/10, 08:30 pm

والله كلها ذكريات حلوة ومزبوطة ..

سلمت يداك ..

واصل ابداعاتك ..

الله يرحم هديك الايام .. قولك رح ترجع ؟

من طرف **M A N A R** 22/08/10, 08:35 pm

مشكور بيبو على المرور نورت

ترجع اي جيل هالايام بدو يترك هيك عيشة

بحياتها مارح ترجع

من طرف **sad eyes** 22/08/10, 08:54 pm

راحت أيام التسعينات
مشكور على نبش الزكريات

من طرف **b a s e m** 22/08/10, 08:57 pm

يا زلمة لوهلة حسيت حالي عمري 90 سنة ..

ههههه

من طرف **M A N A R** 23/08/10, 12:57 am

sad eyes كتب:راحت أيام التسعينات
مشكور على نبش الزكريات

معناها تذكرتي لله يرحمها ايام التسعينات

بيسمعك بيقول شي اديبة معاصرة معناها كنت تلعبي غميضة كثير

من طرف **M A N A R** 23/08/10, 12:57 am

pipo408 كتب:يا زلمة لوهلة حسيت حالي عمري 90 سنة ..

ههههه

سلامتك من الكبر لسى مافرحنا فيك

من طرف **NAPOLION MARMARITA** 23/08/10, 01:12 am

عنجد هلأ ماعاد في طفولة متلا ابل وذكريات

من طرف **Be Happy** 23/08/10, 02:54 am

ههههههههه
يا زلمة ....كانت اوقات حلوة كتير ....حتى بفترة اول ما طلع مسلسل الخوالي ....صرنا انا وولاد الحارة نقلد نصار ابن عريبي .... وجماعتو ....بفرود المي ...هههههههه
كانت ايام حلوة
وانا ما في شغلة من الذكرتون ما عاملة ....ايههههه على ايام الولدنة
مشكور وولف الغالي