الزواج المبكر

من طرف **ازهر الاوى** 28/04/09, 03:31 pm

مرحبا
ملاحظ بمجتمعنا بحماة انو بزوجو البنت على بكير
بدنا رايكم المقنع هاد شي لصالح البنت ولا لصالح شب
ولا هو بالاصل زواج المبكر منيح
وهو صح ولا غلط؟
مشكورين مسبقا

من طرف **GOOD MAN** 28/04/09, 04:01 pm

والله موضوع معقد وفعلا منتشر بشكل كبير
يعني برأي الزواج المبكر مو غلط لأنوا ما في أي حرمانية بالدين بس غير جيد يعني ع الأغلب بتكون الزوجة أو الزوج مو مكملين تعليمون وهاد شي خطير وبكونوا بسن ما بيسمحلون يجيبوا أولاد ويربون و متل ما ماشي بها الأيام
خلف وشلوف بالشارع والله يعين الشارع شو بدوا يتحمل ليتحمل

من طرف **Salam** 28/04/09, 06:23 pm

والله برأيي الزواج المبكر بتختلف صحتو من مجتمع لاخر .. يعني في مجتمعات وخصوصا بحماة مابتهتم بالعلم واهم شي الولد بايدو صنعة وخلصنا ومجتمعات لا لازم يكونوا متعلمين وهيك .. حسب المجتمع اللي هنن فيه ..وبعدين انا ماني شايفة حتى لو تزوجوا مانع لحتى يكملوا تعليمهم ابدا ..
بس لورجعنا للشرع الاسلام حث على الزواج المبكر وفي حديث للرسول صلى الله عليه وسلم بما معناه انو مين يستطيع الزواج فليتزوج وماحدد عمر .. لانو بزمان منتشرة فيه الفتن هيك يمكن يكون الزواج المبكر احسن شي ممكن يحد من الفساد ..
بس صراحة بحس لو الانسان عندو احلامو واهدافو الخاصة اللي بحس انو ممكن الزواج
يعوقها او حتى يبطئ تحقيقها احسن الواحد يكمل اهدافو اول لانو لو ماكملها رح يحط الحق على الزواج ويتسبب بمشاكل مالها اساس من الصحة والمنطق ..
يعني بالاخر الزواج المبكر في حالات بشجع الواحد فيها عليه وحالات مابشجع حسب وضع الاشخاص ..
وعموما يسلمو عالطرح الحلو .. وعفوا للاطالة